ពលករខ្មែរនៅកូរ៉េខាងត្បូង ៖ សៀវភៅណែនាំពិសេសសម្រាប់ពលករខ្មែរនៅកូរ៉េខាងត្បូង
- May 23rd, 2023
មិនយូរនោះទេ សៀវភៅ “ពលករខ្មែរនៅកូរ៉េខាងត្បូង” នឹងលេចចេញជារូបរាងឡើងហើយ ដែលជាប្រភេទសៀវភៅណែនាំពិសេស សម្រាប់អ្នកដែលមានបំណងចង់ឡើងទៅបំពេញការងារនៅកូរ៉េខាងត្បូង, អ្នកដែលបានប្រឡងជាប់ឈ្មោះកំពុងត្រៀមខ្លួនឡើងទៅបំពេញការងារនៅកូរ៉េខាងត្បូង ជាពិសេសសម្រាប់បងប្អូនពលករខ្មែរដែលកំពុងតែបំពេញការងារស្របច្បាប់គ្រប់ផ្នែកនានានៅកូរ៉េខាងត្បូងតែម្ដង។ នេះគ្រាន់តែជាព័ត៌មានបឋម ដែលផ្សព្វផ្សាយឡើងដើម្បីឱ្យលោកអ្នកបានដឹងជាដំណឹងសិនប៉ុណ្ណោះ ដោយព័ត៌មានលម្អិតជុំវិញសៀវភៅនេះ “គេហទំព័រយើងជួយកម្ពុជា” យើងខ្ញុំនឹងផ្សាយឱ្យលោកអ្នកទាំងអស់គ្នាបានដឹងនាពេលឆាប់ៗដ៏ខ្លីខាងមុខនេះ។
តែទោះជាយ៉ាងនេះក្ដី យើងខ្ញុំសូមបញ្ជាក់ថា សៀវភៅដ៏មានសារៈសំខាន់នេះ គឺជាស្នាដៃនិពន្ធរបស់ លោក គង់ រង្សី ជាអ្នកនិពន្ធកម្ពុជាមួយរូប ដែលកំពុងរស់នៅក្នុងប្រទេសកូរ៉េខាងត្បូង ដោយលោកខកខានចេញផ្សាយស្នាដៃនិពន្ធជាច្រើនឆ្នាំមកហើយ ដោយសារតែជាប់រវល់នឹងការមើលថែកូនស្រីរបស់លោកដែលរស់នៅកូរ៉េខាងត្បូងនោះ ទើបតែពេលនេះប៉ុណ្ណោះ ដែលកូនស្រីជាទីស្រឡាញ់របស់លោករាងធំបន្តិច លែងសូវលំបាកក្នុងការមើលថែ ជាហេតុធ្វើឱ្យលោកមានពេលបន្តកិច្ចការផ្នែកនិពន្ធនេះបន្តទៀត។
ដូច្នេះហើយ ប្រសិនបើលោកអ្នកចាប់អារម្មណ៍ចង់ដឹងច្បាស់ថា តើសៀវភៅនេះនឹងបោះពុម្ពចេញផ្សាយជាផ្លូវការនៅពេលណា? ដាក់លក់ក្នុងតម្លៃប៉ុន្មាន? អាចរកទិញបានដោយវិធីណាខ្លះ? នៅកន្លែងណាខ្លះ? នរណាខ្លះដែលគួរអាន? ខ្លឹមសារផ្ដោតសំខាន់លើអ្វី? និពន្ធឡើងក្នុងគោលបំណងសំខាន់ៗអ្វីខ្លះនោះ? និងមានអត្ថប្រយោជន៍យ៉ាងណាខ្លះនោះ? លោកអ្នកអាចរង់ចាំតាមដានការផ្សាយលម្អិតបន្តអំពីសៀវភៅនេះក្នុងពេលឆាប់ៗខាងមុខនេះបាន។ សូមអរគុណ៕
រក្សាសិទ្ធិដោយ ៖ គេហទំព័រយើងជួយកម្ពុជា / cambowriter.com
